The Story of the Oppressed and the Oppressor

నీ స్వరం కావాలి ఓ కరవాలం

     మన్ను తినెడి మురళి ధారుడి

మధుర గానం తిరగవ్రాసి

పన్ను తినెడి ప్రజా ప్రతినిధులు

ప్రజల నిధులను భక్షించిననాడు

నీ స్వరం కావాలి ఓ కరవాలం

అశేష ఆంక్షలకై విశేష వాంఛలకై

నిశేష జనావలి ముందు చేసిన  కఠోర ప్రతినలను గుర్తుచేసేందుకై!

    రామచంద్రుడి రామరాజ్యం

వర్ణ సంస్కృతికి ప్రతీతి అంటూ

ఓట్లకోసం అవితెచ్చే నోట్లకోసం

కుల మత భేదాలను బలపరుస్తున్ననాడు

నీ స్వరం కావాలి ఓ కరవాలం

కులం తెలిపేది కృషితత్వమనీ

మతం తెలిపేది మానవత్వమనీ

మదమెక్కిన అవినీతినాయకులకు గద్దె దింపి గుర్తుచేసేందుకై !

     విశ్వమందు నా దేశం గొప్పదంటూ

దేశమందు నా రాష్ట్రం గొప్పదంటూ

రాష్ట్రమందు నా ప్రాంతం గొప్పదంటూ

ప్రాంతమందు నా గ్రామం గొప్పదంటూ

గర్వించదగ్గ ప్రాంతీయతత్వాన్ని

రాజకీయ స్వార్ధానికి వాడుకున్ననాడు

నీ స్వరం కావాలి ఓ కరవాలం

గుండె బలమే కండ బలముగ

తెల్ల దొరలను తరిమికొట్టిన నా దేశం

ఏ తెల్లపంచెల దండ బలముకి

బానిసత్వం వహించబోదని

విభజించి పాలించే ప్రతి నాయకుడికీ,  స్వతంత్ర భారత చరిత్ర గుర్తుచేసేందుకై!

     స్వదేశ సంపద విదేశమేగించి

పరదేశ దోపిడికి ఆర్జ్యం పోసి

అంతర్జాతీయ సంస్థల ముందు

సుసంపన్న భారతాన్ని బానిసగా నిలబెట్టిననాడు

నీ స్వరం కావాలి ఓ కరవాలం

జనం కోసం జననమంటూ

ప్రతిఫలం కోరని శపధం  పూని

క్షణం తిరగక అంతా మరచి

ధనం ముందర చేయిచాచే , నీచ రాజనీతికి మట్టి విలువ గుర్తుచేసేందుకై!

                 నీ స్వరం కావాలి ఓ కరవాలం

స్వతంత్ర భారతాన్నికుతంత్ర రాజకీయాలనుంచి విముక్తి చేసేందుకై !

                 నీ స్వరం కావాలి ఓ కరవాలం

సప్తవర్ణ ప్రజాస్వామ్యానికి  స్వార్ధవర్ణ దగారాజుల నుంచి, స్వేచ్ఛను సంపాదించేందుకై !